AJK Elections 2026: Bagh, Haveli Mein Ghair Hatmi Natayij Aana Shuru

Azad Jammu and Kashmir (AJK) Legislative Assembly elections ke teesray marhalay ki polling Bagh aur Haveli ki chaar constituencies mein mukammal ho gayi hai, jabke ghair hatmi natayij aana shuru ho gaye hain.

Polling subah 8 baje se shaam 5 baje tak jari rahi. Election Commission ke mutabiq in constituencies mein taqreeban 460,000 voters apna vote daalne ke ahl thay. Poonch aur Sudhnoti ke kuch halqon mein elections baad mein karwane ka faisla kiya gaya hai.

Bagh Mein Kaun Aagay Hai?

LA-14 Bagh-1 ke 214 mein se 182 polling stations ke ghair hatmi natayij mein Sajid Iqbal 34,692 votes ke saath aagay hain, jabke Sardar Attique Ahmed Khan 16,443 votes ke saath doosray number par hain.

LA-15 Bagh-2 mein ibtidayi natayij ke mutabiq Muhammad Mushtaq Ahmed Minhas (PML-N) 349 votes ke saath barhattari hasil kiye hue hain.

LA-16 Bagh-3 mein Sardar Mir Akbar Khan (PML-N) 9,243 votes ke saath aagay hain, jabke PPP ke Sardar Qamar Zaman Khan ko 7,144 votes mile hain.

LA-17 Bagh-4 mein Chaudhry Mohsin Aziz (PML-N) 443 votes ke saath lead kar rahe hain.

PPP Ka Polling Process Par Aitraaz

PPP Senator Sherry Rehman ne kuch polling stations par voting mein deri aur PPP polling agents ko andar jane se rokne ke ilzamat lagaye. Unhon ne kaha ke voters ko voting ke liye poora waqt milna chahiye aur election process mein transparency ko yaqini banaya jana zaroori hai.

PML-N leader Rana Sanaullah ne in allegations ko siyasi narrative qarar dete hue kaha ke PPP apni possible defeat ko rigging ke ilzamat ke zariye cover karne ki koshish kar rahi hai.

AJK Elections Ka Pehle Ka Rujhan

Pehle do marahil mein PML-N 24 seats ke saath sab se aagay rahi, jabke PPP ne 10 seats hasil ki hain. PML-N ko AJK Assembly mein two-thirds majority ke liye mazeed chhe seats darkar hain.

Aagahi Hub par AJK elections 2026 ke ghair hatmi natayij aur mazeed updates ke liye hamari coverage follow karein.